2021改變世界嘅方法,就靠...

"唔做"義工挑戰​

「微義工」行動

完滿結束

社職 SOCIAL CAREER "唔做"義工 - 微義工服務

2021年,可以點樣令個世界變得好啲?做義工拯救世界?No喇... 要改變世界,係要靠「唔做」義工!
2021年,Social Career社職挑戰大家「唔做」義工!快啲參加挑戰啦!
喺2-3月期間,你可以參加《"唔做"義工行動》,再要於日常生活「唔做」一啲破壞環境嘅行為,其實你已經係做緊一種「微義工服務」,逐少逐少改變世界。

當你完成部份挑戰,Social Career就會向一間指定環保機構捐出$10(即係如果你可以完成全部25項挑戰,就會捐出$120)!

挑戰者BINGO卡

​進度實時公佈

​歡迎立即cap圖開心share,畀朋友知道你嘅挑戰完成度!

"唔做"義工25項挑戰

 

1. 唔食淨食物  KO大嘥鬼

食淨嘅食物,都會落到堆填區。香港一年就有數以千噸剩食被倒入堆填區。唔食淨食物,就可以減輕堆填區嘅壓力。

2. 登記成為1間環保機構嘅義工

​如果你想同一啲志同道合嘅朋友一齊做一啲改善環境嘅嘢,你可以喺社職登記成為一間環保機構嘅義工。

3. 唔搭𨋢  改行樓梯

𨋢嘅運作係靠電力大家都一定知,所以唔搭𨋢就可以慳到電。改行樓梯,更加可以強身健體𠻹!

4. 唔開著燈又唔用  浪費電力

有個都市傳說話啲燈成日又開又熄會易壞啲。事實係唔會㗎!唔用嘅時候就熄咗盞燈,咁就唔會浪費地球資源。

5. 唔買膠樽裝飲品

塑膠真係對環境做成好大破壞嘅物料,被製造之後,佢會存在喺地球上四、五百年先有機會分解到。所以減少購買,就可以減少需求,咁就係最直接話畀生產商知我哋唔要咁多塑膠。

6. 將呢個"唔做"義工行動分享到社交媒體

​雖然呢個"唔做"行動好適合一個人做,亦好容易一個人做,不過如果有100個,1000個甚至10000個人都一齊"唔做",咁做效果就更顯著啦!立即利用社交媒體,廣傳畀更多人知,等更多人一齊挑戰啦!

7. 唔打印電子檔案出嚟

如果個電子檔案本身可以喺電腦上面睇到,就真係盡量唔好印出嚟,減少用紙啦...嗚嗚~>.<~啲樹係無辜㗎...

8. 唔攞塑膠飲管飲嘢

​好多人都有睇過嗰幅海龜被膠飲管插住個鼻嘅相。呢啲咁令人心痛嘅場面,大家都唔會想再發生。所以,我哋一齊停止用膠飲管啦。

9. 唔用即棄餐具

​好多即棄餐具都係用塑膠製造,即使有啲係用木或即其他物料造成,但都係一用即棄,浪費物料之餘又形成處理固體垃圾嘅壓力。

10. 唔衝動購買一樣唔會用嘅物品

​香港人好多都鍾意買嘢,尤其疫情下冇得去旅行,儲多咗錢,購買力都大咗。有時買嘢,純粹基於一時衝動,之後就放喺一角封塵,最後又係直入堆填區,好浪費地球資源。

11. 唔用紙杯喺飲水機斟水

有時辦公室或出面嘅會客室,會為咗方便客人而提供紙杯。方便就係方便,但係就唔太環保,而且好多紙杯內層通常有一層膠膜,係唔可以當普通紙回收㗎。

12. 唔用即棄紙杯嚟飲咖啡

有時就算你係喺咖啡店坐低飲杯飲品,店員都會用紙杯裝飲品畀你。你可以同店員講多一句「唔用紙杯吖,唔該」。

13. 邀請1位朋友參與"唔做"義工行動

呢個挑戰好重要,因為每多一個人參加"唔做"微義工行動,呢個行動嘅影響力就會加倍!由你開始,影響你身邊嘅朋友!

14. 唔食肉  食一餐全素食

對比耕種,生產肉類嘅過程所造成嘅碳排放高出至少10倍。而每一餐食少一啲肉類,或者有時全餐食素,唔會對均衡飲食帶嚟影響,仲健康啲𠻹。

15. 唔搭一程高碳排放嘅交通工具

要做到交通工具零碳排放,喺香港未必可能。因為香港以風力或太陽能發電嘅比例佔好少,所以就算電動車,都會間接因為生產電力過程而產生碳排放。但用電嘅交通工具,點都好過燒汽油、石油氣嘅車。

16. 唔用有微膠粒嘅個人產品

好多化妝同個人護理產品,例如磨砂潔面乳、脣膏以至牙膏,都係微膠粒嘅主要源頭。而呢啲微膠粒落到去海洋,進入食物鏈嘅底層,最終會進入翻人體,影響人類健康。

17. 唔用發泡膠或塑膠飯盒裝外賣

因為疫情關係,最近香港人買外賣嘅數量多咗好多,因而所用到嘅即棄外賣盒都多咗好多。如果可以,我哋都盡量嘗試減少用發泡膠或者塑膠飯盒啦。
 

18. 唔棄置可回收嘅物料入垃圾筒

有啲比較好嘅產品,已經係用咗可回收重用嘅物料生產,希望使用者用完後可以畀佢循環再造。如果我哋當佢垃圾棄置,就浪費咗呢啲可循環再造嘅資源喇。
 

19. 唔買鋁罐裝飲品

其實鋁都係一種重要嘅金屬資源,而且係一種不能再生嘅資源,用完就冇㗎喇!如果可以減少使用就最好啦,不過就算用,都記得要清洗之後回收再造啊!
 

20. 關注3間環保機構嘅社交帳戶

支持環保機構嘅工作非常重要,而喺社交媒體關注佢哋係一個最容易嘅支持方法,唔係唔做呀?
 

21. 唔沖涼...超過5分鐘

​要保持個人衛生,當然唔可以唔沖涼。不過,為咗節約水資源,唔好沖超過5分鍾啦(為咗環保,唯有唔開浴室個人演唱會囉...)
 

22. 唔好唔熄mon  開著到第二日

離開公司或者工作檯,記住要養成熄mon(顯示器)嘅好習慣,因為開足成晚又冇人用,好浪費呢!
 

23. 唔買過度包裝或個別包裝嘅食品

通常個別包裝嘅物料都未必係可回收嘅物料。有時啲包裝的確係好靚,不過最緊要係內涵吖嘛,你識點揀啦!
 

24. 同1位朋友一齊完成其中一個挑戰

​呢25項挑戰,有部份係好適合同朋友一齊做嘅,例如搭低碳排放交通工具、行樓梯、食素食等等。約埋你嘅朋友一齊挑戰!
 

25. 唔要購物膠袋  自備購物袋

​自備購物袋呢個良好習慣,香港人近年都做得好好,所以我哋唔好懶惰,要保持住!多謝你支持環保!

donate.png

​完成挑戰 = 籌款

完成25項挑戰

社職向環保機構捐出$120

​於2-3月期間,當參加者完成挑戰及匯報完成度後,BINGO卡會實時更新。每當你成功於BINGO卡上完成一直/橫/斜行,Social Career就會向一間指定環保機構捐出$10(即係如果你可以完成全部25項挑戰,就會捐出$120)!

完滿結束
 

​聯絡查詢

如有任何查詢,可以電郵致

cs@socialcareer.org

認識社職

Social Career

瀏覽網站:

https://socialcareer.org

  • Facebook
  • Instagram
  • YouTube

© 2021 by Social Career